夜市放送頭│海洋國家的子民：陳宣余 自由藏水文化報你知

Rti 中央廣播電臺 Rti 中央廣播電臺

陳宣余

來賓：陳宣余

《台灣夜市 Taiwan Yes!》今仔日邀請阿旻的國小佮高中同學陳宣余來上節目，分享伊的海洋人生。讀過軍校(中正預校國中部)，論真講起來，彼時伊上大的夢想，其實是欲開空軍的飛行機。不而過因為無適應軍校的烏暗面，就無閣繼續讀軍校。

大漢後，為著欲實踐伊飛行員的夢，陳宣余閣開始做準備。毋過因為往過身體捌手術的過，飛行的夢想就按呢放下。陳宣余煞一步一步踏入去海洋的世界，嘛算是運命的安排。

大學考試，伊考牢基隆的海洋大學。除了學校海洋的智識，伊嘛開始就接觸藏水，只是彼時猶毋知影自由藏水這號專業名詞。出社會後，伊捌做過導遊、領隊，去過超過30个國家。天南地北全世界踅透透，除了𤆬隊，上愛猶是佇海裡藏水。

自帛琉Long Stay藏水一段時間轉來到台灣，才發現自由藏水內底的學問真深，甚至有真專業的活動佮比賽。這馬伊成立「台灣水域遊憩協會」來推廣這項活動，目的是欲建立台灣正確的水域觀念，減少水上活動的危險。另外，伊嘛幫忙其他水上運動協會，辦理大大細細佮海洋水文化相關的比賽，予台灣人更加了解這項運動。

台灣四面環海，海洋文化應該是咱寶島愛發揚的重點。來聽陳宣余按怎規劃，按怎推廣這个文化。