夜市放送頭｜懷念永遠的播音員 良山兄

Rti 中央廣播電臺 Rti 中央廣播電臺

永遠的播音員良山兄

廣播聲音的力量，使人感動，佇南部做廣播做甲出名，臺灣廣播教父良山兄，82歲的歲壽過身。往過唱出真濟代表歌曲，親像《歹命阿狗兄》、《風流的阿狗兄》。伊的查某囝陳思安最近公布爸爸過身的消息講：「歹命的阿狗兄欲來去夢遊仙公廟矣」。

良山兄過去佇南台灣老輩的廣播界，名氣有影響亮，佇高雄鳳鳴電台主持《司機俱樂部》，濟濟運將一聽就牢咧。經歷廣播、音樂佮做生理的過程，人生有起有落，不而過伊攏保持正面樂觀的積極態度。家己事業有成功，嘛願意牽教後輩，阿吉仔、許不了，甚至是豬哥亮。攏是良山兄一手提拔，看見in的特質，尾手有影是衝甲掠袂牢，紅到半邊天。

雖罔良山兄佇音樂、廣播界攏出名，煞無向望家己的大漢查某囝陳思安踏入歌唱界，甚至閤罵伊是三流歌手。話一个出喙，爸仔女有１０年的關係冰冷。一直到陳思安入圍最佳台語女歌手，良山兄和查某囝坐佇臺跤。雖然最後佮金曲獎相閃身，但爸爸的鼓勵，改變兩人的關係。閤較濟精彩內容，請準時收聽中央廣播電台《臺灣夜市TaiwanYes！》。