Rti 中央廣播電臺 
Rti 中央廣播電臺 
前外交官劉仕傑
來賓:劉仕傑(前外交官)
《臺灣夜市Taiwan Yes!》《夜市放送頭》單元邀請前外交官劉仕傑來分享伊的人生故事。逐家若愛聽劉德華的華語歌曲，可能攏有印象《男人哭吧不是罪》這條歌。伊捌佇讀臺大三年仔的時，和雙生仔阿兄擔任音樂錄影帶MV演員。
其實，劉仕傑屏東麟洛出世的囡仔，隨爸母工課搬來到臺南，靠家己讀冊，一路考牢臺南一中、臺大閣有清大。爸爸是骨力拍拚做工的人，媽媽開剃頭毛店，養飼伊和伊的雙生仔阿兄。
爸爸媽媽雖然冊讀無懸，不而過對兩兄弟仔的英語栽培之路無停過。爸爸開重本，買真濟英語教材予in看。劉仕傑分享伊無補習過，不而過靠家己對英語的愛，國中進前已經將國中三年的英語課本讀透透。滑溜的英語，是興趣閣有苦練，才有的底蒂，考牢外交官英語這个科目對伊來講，根本就毋是真困難的代誌。
不而過考牢外交人員後，實際落去做，才知影做外交官絕對毋是簡單的代誌。雖罔這項工課看起來薪水懸、福利好，閣有機會參與第一線國際佮國內大事，不而過，外交工課閣有無暝無日的作業時間，佮厝內的人就愛四散過家庭生活。
臺灣外交關係特殊，劉仕傑分享伊過去派駐過美國洛杉磯，和當地警察LAPD愛做偌濟事先的交涉，才通予咱臺灣政府官員入境順利。另外，嘛用派駐佇咱邦交國帛琉的經驗，說明佇這个無夠兩萬人的國家，平常時無法度見著面的官員、甚至總統，咱通用棒球做外交，透過摃球做接接、來交陪。雖罔無繼續做外交官，改投入公共事務的道路，閣較濟劉仕傑的故事，敬請透過節目做伙來聽。
