夜市放送頭｜江仲豪的棒球路 - 節目

江仲豪教練

受訪來賓:江仲豪(棒球教練)

臺灣1970年代出現三級棒球熱潮，江仲豪是代表性的人物之一。今仔日《臺灣夜市Taiwan Yes!》邀請你做伙來聽江仲豪教練的故事。講著伊的棒球路，國小人攏咧痟棒球，不而過一開始伊並無去考球隊。某一日教練看著這的囡仔體育的協調性遮爾好，想欲搝伊入去國校仔球隊。但厝裡家境無好，媽媽咧阻擋。結果濟濟教練攏走去揣江仲豪阿母，共講拍棒球有可能出去國外比賽、嘛會受總統接見等等的好處，媽媽思考了後，總算答應。

江仲豪尾仔入去到美和中學棒球隊，又閣是另外一段故事。國小出業離鄉背井來到屏東，因為初初無適應，有夠艱苦。有一回欲放長假，媽媽來到屏東欲接，教練感覺江仲豪一下轉去，可能就袂閣轉來。佳哉，三叮嚀四交代五姑情，才改變伊想欲離開的想法。

1972年臺灣頭一改組青少棒代表隊去美國比賽，1974年第一改組青棒隊，兩改真有歷史意義的國家代表隊，江仲豪攏是代表隊成員。尤其，彼的年代的球內，高英傑、郭源治，逐家攏熟識透透，in做伙提著「世界冠軍」，總統彼時接見、坐吉普車遊行，甚至閣出紀念郵票，成做臺灣棒球的國家民族英雄，熱度真懸。江仲豪自美和青少棒、青棒、空軍虎風棒球隊、兄弟業餘閣到職業棒球做球員，閣到職業棒球教練、總教練，精彩故事邀請你做伙來聽。