Rti 中央廣播電臺 
Rti 中央廣播電臺 
親愛愛樂弦樂團
來賓:親愛愛樂團長王子建、創辦人陳珮文
《臺灣夜市Taiwan Yes!》邀請《親愛愛樂》團長王子建和陳珮文兩位老師，團員石志祥、曾詩芸，做伙來分享弦樂團《親愛愛樂》年度創作《Lawa的彩虹橋》。
受著疫情兩冬外，《親愛愛樂》大型演出全全取消。今年佇咧歇熱期間，推出全新製作音樂戲齣《Lawa的彩虹橋》，描述一个囡仔Lawa，自細漢佮阿媽Yaki相依為命。有一日，阿媽煞破病矣，Lawa提起勇氣，行入去魔鬼森林，走揣傳說中神秘的性命之泉，展開冒險的歷程。故事佮音樂編排等內容攏是《親愛愛樂》團員家己創作。
王子建和陳佩文兩位老師，本底只是去山頂教冊的老師，用大提琴、小提琴等樂器，教4位學生學琴，想欲用音樂提升當地部落囡仔學習的動力。尾仔愈來愈有規模，嘛愈濟人來學。兩位翁仔某老師嘛鼓勵學生去考音樂班，攏順利錄取。不而過，陳子建老師分享，一段時間以後，伊發覺有寡囡仔，若照一般制度性的體制，會無適應。
幾冬後，想欲跳脫臺灣菁英的音樂班彼款框架仔，樂團自南投縣仁愛鄉出發，閣成立親愛愛樂文化基金會，佇南投縣中興新村開始實驗學校，成做全臺灣第一間用音樂佮藝術做主題國高中階段實驗教育機構。予袂少奧萬大深山的原住民囡仔，繼續通圓𪜶的音樂夢。
《親愛愛樂》團隊成員，年齡層自國小到大學攏有，平常時仔除了教囡仔音樂，王子建講生活教育嘛重真要，囡仔喙小做手工甜路，烘煙腸，甚至攏有考過餐飲丙級證照。團員愈來愈濟，甚至有人閣有中型巴士的駕照。除了音樂，𪜶嘛用𪜶的雙手，做點心、麵路、甜路親身募款，向望閣較濟人來支持。
