夜市喊玲瓏｜高仁山 開船遊日本

Rti 中央廣播電臺 Rti 中央廣播電臺

來賓:元智大學高仁山教授

去日本開車𨑨迌已經OUT，疫後遊日本，這陣會當按呢做：「開遊艇、開船耍日本大港口」。《臺灣夜市Taiwan Yes!》咱欲邀請開船遊日本的高仁山教授，做伙來分享伊三個月的大航海行程。

因為疫情的因素，全球封鎖欲三冬，最近才開始有一寡對外的旅遊。尤其，臺灣嚴格的邊境封，濟濟人想欲去日本𨑨迌。經濟學博士高仁山開船耍日本，這陣欲一路共船開倒轉來臺灣。伊舊年早早就買好船仔，因為日本疫情封鎖，一直停佇咧神戶遊艇碼頭。今年六月日本開放商務旅客，高仁山申請簽證後，飛去日本展開伊開船遊日本到臺灣的大航海行程。

高仁山自細漢佇咧基隆大漢，親身看著基隆港口人按怎討海生活，嘛看著興盛到衰敗的臺灣海洋文化，到這陣行向開放的海洋文化。論真講起來，這回的航海過程，其實有真大的任務，就是好好仔向日本學習，學看人日本按怎做，嘛提出建議予政府，佇未來休閒的遊艇業規劃，閣有咱對海的認捌愛較澈底。航海旅行過程有真濟趣味的代誌，欲和逐家分享，趕緊來收聽《臺灣夜市Taiwan Yes!》節目。