難難難！粵語拼音裡面 韻母最難

Rti 中央廣播電臺 Rti 中央廣播電臺

粵語拼音，主要係三個部分，聲母+韻母+聲調。聲調：背熟「三碗半牛腩飯」，聲調搞掂。聲母，同英文好似，識英文基本識左9成。韻母，就真係粵語拼音裡最難嘅部分。

 

對非粵語母語者嚟講，韻母嘅難在於結構難，唔熟悉嘅嘢亦都多，又有啲音對佢地就係難發。

 

舉例嚟講，國語係冇分邊個音長，邊個音短。但係喺粵語裡面，韻母分兩部分，一部分係真正發音嘅元音，另一部分係韻尾。元音係有長短之分，而且個個原音都有長有短。譬如a嘅發音，有短嘅a，有長嘅aa，長啲短啲，成個音就唔同晒。

 

都係舉例好明白啲，譬如嘲，嘲笑嘅嘲zaau1，長嘅aa。短嘅a，就算前後一樣，zau1，發出嚟係周！識粵語嘅人，直接發出「周」「嘲」，唔會覺得複雜。如果試吓倒轉，「周」「嘲」點樣用粤語拼音拼出嚟，邊個音係邊個，您又分唔分得清楚呢？！

 

一再同大家講粵語拼音，識粵語嘅人可能覺得好嘥氣，明明就已經識聽識講，拼音呢啲留俾唔識粵語嘅人去煩啦！係，您咁講都冇錯嘅。只不過既然係對粵語有興趣，就想俾你知吓粵語拼音係點樣嘅一回事，以後或者傾偈都可以多個話題呢！