Rti 中央廣播電臺 
Rti 中央廣播電臺 
粵典App
粵典線上版詞典
除左字典，粵語係好少粵字嘅字典或者詞典。意思啫講，當你想學粵語，粵語口語所對應嘅嗰啲字，一向都係各有各寫，想查想學，以前真係冇咩工具、資料可以幫到手。
咁想寫廣東字嘅時候，最多都係睇人寫，人地點寫自己點寫；未睇過嘅就試吓同音字加個口字邊，有陣時都可以估啱；又或者用英文搭夠。總之，用粵語寫嘢，就講十幾年前，都係一件有心先至可以堅持嘅事。
再加上，近年嚟，喺香港實施普教中嘅學校愈嚟愈多。好多嘅事，令鐘意粵語嘅有心人就係想為粵語做啲事。所以，而家已經可以睇到，喺網路上，粵語嘅教學資源、粵字嘅使用都愈嚟愈多。譬如：粵典--廣東話詞典、Subanana--自動廣東話字幕生成工具、漢字翻廣東話嘅粵語拼音轉換工具、粵普對譯嘅網站、粵語拼音教學......。
「粵典」創辦人劉擇明，佢都係過來人，佢好明，做粵語嘅教學資源就好似做基礎建設一樣，做左大家嘅生活會變好，但係大家又唔係好覺得你嘅存在。
而無論字典、辭典做得幾咁好，冇教科書、冇學校、冇人嘅配合，對推廣粵語都唔會有好大嘅功效。因為推廣粵語需要嘅係母語者嘅鼓勵、需要有機會去用呢個語言、需要有足夠嘅教材、需要有足夠嘅學校去教佢地講粵語。而事實上，呢啲事，喺粵語都是缺乏嘅。
不過唔緊要㗎，你做一啲，我做一啲，大家都去做自己識做，覺得應該做嘅事，自然可以引起更多人嘅注意。咁樣，對粵語，就可以幫到呢個語言嘅發展了！
