Rti 中央廣播電臺 
Rti 中央廣播電臺 
我手寫我口，寫粵語
粵語，呢種語言都幾得意！有好多母語係粵語嘅人，講嘅係粵語，執筆寫嘢就係寫書面語。尤其好多中老年人，明明唔識普通話，唔識國語，執筆寫嘢依然係寫書面語。
咁都有原因嘅，因為就算講粵語，以港澳為例，讀嘅睇嘅都係書面語寫嘅中文書。考試或者正式文件，都係寫書面語，習慣成自然，久而久之，想寫都唔識寫。但係，寫粵語其實只需要練習，大概練一、兩個星期，已經識講嘅語言，要將佢寫出嚟係唔會難嘅。而且，寫粵語，唔覺得更貼近自己嘅意思咩？
咁當然，粵語有好多音都冇字，或者講好多人唔識寫嗰啲字。用漢字嘅地方，都有呢個問題。解決嘅辦法有兩個，一、借助拼音（呢個時候知道拼音嘅好用了！）二、造字（呢個對以正字為標準嘅人嚟講，可能未必認同。）
總之，當你唔識寫嘅時候，一個受過教育嘅人都唔識寫，即係一大部分嘅人都唔識寫嘅字，呢啲就係作者、作家可以做嘅地方，創作一個好字，嚟代表呢個詞語。
舉例嚟講，“?”起心肝呢個?字，呢個字應該好多人都唔知點寫。咁就有人諗，“?”係用手拎起嘅意思，的又係同音字，手字邊加個的，就成左呢個“?”，大家一睇，同音、同意思又一睇就明，係唔係三全其美呢？！
至於正字本嚟係邊個字，係有人一直好努力追尋研究呢啲嘅學問。但唔普遍、大家都唔識，一直用以前嘅人嘅標準，用「對、錯」作為標準，對粵語又係唔係好事呢？
