Rti 中央廣播電臺 
Rti 中央廣播電臺 
香港街道（圖：Jason Lam／pixabay)
淨係呢個標題，大概就可以嗌餐死！
基本上，識粵語有n/l之別嘅，從學者到粵語愛好者，對呢個問題都係好直接分兩派。
一派認為當然係懶音，要改翻正。另一派嘅意見比較雜少少，佢地自己知道n/l嘅差別，要唔要分就睇人睇場合。正式場合正式發言就字正腔圓，n係n，l係l。平時日常生活，尤其對住嘅都係nl混用嘅人，咁就一齊l落去，平易近人。對一般人n/l分唔分亦都唔係好在意，或者就算在意都係希望做傳媒、做老師、做研究嘅人要講正啲。
咁至於一般嘅粵語母語者，其實，有唔少粵語母語者可能一直都唔知有n/l嘅分別。
真係唔怪得佢地，因為粵語有啲地區的確係唔分n/l，從細阿媽就係咁講，學校先生係咁教，周圍嘅人都係咁講，再加上又冇學過粵語拼音，冇拼過呀！點知有n/l之分？
世界好大，講粵語嘅人仲有好多，有人分有人唔分。譬如好似港澳，大部分嘅人都唔分，仲有傳統嘅西關音亦都唔分。但係廣州舊城就好多人有分，甚至旅居海外嘅華人，都有人分得好清楚。不過，佢地會分，好可能都係從細聽阿爸阿媽街坊就係咁講，人地有分，佢就跟住分囉！
所以n/l不分到底算唔算懶音呢？定係講，係為左好發音好講嘅時代轉變？定係算係有啲地區嘅特色發音呢？
