Rti 中央廣播電臺 
Rti 中央廣播電臺 
字典、跟通書
一個字點寫點讀點用，喺台灣，以教育部公布嘅做標準，無得嗌！阿sir miss都係依呢個標準嚟扣分。
而粵語粵字，從來冇咁樣嘅標準，呢個標準係指冇一個由上而下、或者一個高高在上嘅人、國家、定係團體，訂出咁樣嘅一個標準。冇呢個標準，係唔係唔得呢？
唔使跟死一套標準，好處當然係百花齊放。淨係睇時下嘅潮語，幾年一變，唔識潮語，一開口人地就知你離地。仲有粵字，各有各寫，只要同音字咩都有人寫。雖然而家係有好多人推廣所謂嘅“正字”、“本字”，教係咁教、講係咁講，不過好多人仲係自己寫自己嘅。只可以講，點樣寫、點樣大家睇得舒服，又唔係考試，又唔係為左搵食，一般人寧可跟一套社會上認可嘅書寫習慣，都唔會跟高高在上嘅一套標準。
咁仲未有官方嘅標準，缺點係咩呢？最大嘅缺點就係各說各話，按學術嘅標準會俾人話錯，按民間嘅習慣同樣都有人話錯。而且仲經常有人攞住古書嚟話你錯，係呀！用古代嘅嘢嚟挑戰現代嘅嘢，係一種常態。
不過，語言係會隨時代而改變，隨住語言改變而有新嘅寫法，一定有佢嘅原因。用歷史上1千年前嘅寫法嚟寫而家嘅語言，合唔合理，見人見智。但係睇過好多粵字嘅所謂歷史上“本字”之後，可能好多人都會直接放棄我手寫我口，因為實在太難寫啦！
粵語粵字冇標準，咁我地可以做咩呢！當仲未有一個官方機構決定乜嘢係啱，乜嘢係錯嘅時候，民間一般人就可以整理出大家嘅習慣。而原來，好多官方機構訂嘅呢啲標準，佢地嘅來源都係民間習慣嘅整理。
