香港粤語嘅前世今生

Rti 中央廣播電臺 Rti 中央廣播電臺

香港人講粤語，咁香港人而家講嘅呢種--大家聽慣嘅粵語口音，到底係從何而嚟？

 

呢個真係要講吓歷史。首先，香港係開埠之前，原居民有四大族群，包括：香港圍村人，啫圍頭人，圍頭人講圍頭話；疍家人，啫水上人，水上人講疍家話；客家人，客家人講客家話；鶴佬人，啫閩南人，閩南人講鶴佬話，各講各嘅語言。

 

咁係香港開埠之後，因為太平天國戰禍嘅影響，好多華南人湧入香港，呢個係香港粤語嘅雛形。

 

到左1949年前後，再到50、60、70、80年代，因為政局因素、經濟發展、搵錢搵食，陸陸續續，好多上海人、江浙人、潮汕人、廣府人、寶安縣人、粤西人...，無論係偷渡，定係申請批准，一批批各地口音嘅人，或前或後去到香港，經過時間，經過自然演變，而揉合成而家嘅香港粤語。

 

咁樣嚟睇，香港口音應該係好雜先啱，點解會出現而家愈嚟愈單純統一嘅狀況？

 

呢個一定要多得60、70年代開始，香港勁到爆嘅流行歌影視文化同傳媒。香港嘅電視、電台、電影、流行歌...，係大肆傳播之下。聽住電台、睇住電視大嘅呢一輩輩嘅人，自然學晒傳媒所傳播嘅口音。

 

再嚟，香港生活壓力大，大概都係原因之一。粤語係香港嘅生活語言。當年，大陸移民到香港之後，為左生活，為左唔想俾人貼「阿燦」標籤，介意自己口音嘅人，就會好努力學好粤語。呢個係當年嘅狀況，而家好多新移民係覺得唔使學。

 

總而言之，就算移民嘅第一代仲有鄉下嘅音，佢嘅下一代，自自然然都會跟左當地嘅音。所以咁樣睇，只要幾十年，一個地方嘅主要口音就可以形成出嚟！至於會形成點樣嘅口音，同當時嘅社會、經濟、人口結構組成、流行文化、傳媒...乜嘢都好有關係！