Rti 中央廣播電臺 
Rti 中央廣播電臺 
粵語詞典，寫粵語嘅好幫手
以前，大概二、三十年前，仲有一個好刻板嘅印象，就係覺得通俗作品先會用粵語寫，
可能係受到處買得到嘅八卦雜誌所影響，定係從細學校唔教，唔俾寫嘅影響？？
總之，當年嘅八卦雜誌係學粵字最容易攞到嘅教材，唔睇都唔知原來好多粵音嘅字係咁樣寫㗎！
粵文粵字真係比較通俗，比較市井？？粵語，喺日常生活中，係講咩都得，意思啫講，粵語係冇嘢唔可以講。粵語可以講政治、講學術、上堂、講功課、詩詞歌賦...甚至港澳特首嘅施政報告、議員質詢，通通粵語都係暢通無阻，生動自然，一聽就明。
既然粵語可以講任何嘅話題，講任何嘅事情。粵文，用粵語嚟寫嘢，我手寫我口，咁又點會粗俗！又點會淨係可以寫通俗作品。
或者最大嘅關鍵都係寫嘅人，寫嘅人嘅文學素養、寫作能力、作品嘅定位、粵文粵字嘅掌握能力；仲有，睇文嘅人嘅刻板印象......
不過好彩，喺呢十幾年嚟，成個狀況已經變左好多。而家嘅粵語人，喺日常聯絡、廣告甚至文學創作，已經用粵語寫多左好多。係多左，不過仲唔夠多，仲係需要繼續努力同推廣。
