Rti 中央廣播電臺 
Rti 中央廣播電臺 
教育部表揚推展本土語言有功人士與團體。(陳國維 攝)
台灣從民國90學年起，啫2001年起，小學生喺學校就必須要揀一種本土語言嚟學（本嚟以前叫鄉土語言，後來改叫本土語言），呢啲本土語言包括有：閩南語、客家話、另外仲有十幾種嘅原住民語。
實行左18年之後，喺兩年前，108新課綱上路，小學生可以揀嘅本土語言，除左本嚟將近嘅二十種語言之外，仲加多左越南、印尼、泰國、緬甸、柬埔寨、馬來西亞同菲律賓七種新住民語言可以揀嚟學。
一開學嘅時候，每個小學生都會收到一份本土語言意願調查表，加加埋埋二十幾種語言，任小學生揀一樣嚟學。大家諗諗，一個小學雞，可能連調查表裡面嘅字都未識得晒，就可以有咁多種語言可以揀嚟學，真係眼花撩亂，好新奇、好得意。
雖然，對於咁樣嘅本土語言課程，好多人係好有意見。因為係一個星期一堂課，有人覺得根本冇用；有人覺得嘥時間；有人覺得師資唔夠；有人覺得學好英文先講......反對嘅意見都好多好多。
不過從實際嚟睇，小朋友一堂一堂咁學，日積月累，其實係有學到嘢。大家都知道，識講閩南語嘅人，未必識用閩南語讀書，睇住小朋友從唔識閩南語，到可以用閩南語讀有教到嘅嗰啲課文，身為家長，都覺得好有成就感㗎！
講咁多到底想講咩呢？就係想講，以粵語為母語嘅地區，到底有冇可能好似台灣一樣，將母語納入學校課程當中呢？只要納入課程，對推廣、教學、研究、師資、保存、傳承...一定都好有用。
