Rti 中央廣播電臺 
Rti 中央廣播電臺 
侯沛吟
來賓：侯沛吟
「你敢有溝通困難的症頭？」、「感覺話袂投機？」，閣有「做公關總是㧎㧎（khê-khê)」。《台灣夜市 Taiwan Yes!》今仔日邀請浪LIVE總監侯沛吟，欲佇《夜市放送頭》單元，專業分享其中的鋩鋩角角。
侯沛吟粒積十外冬的媒體經驗，自TVBS、東森記者做起、進入三立開始播新聞、嘛播氣象。閣來踏入澳亞衛視做主持人兼製作人，上尾一个電視經驗是佇年代壹電視生活組做組長。
40外歲才決定欲換一途行，離開新聞業界進前，其實伊捌探看真濟無仝的行業，終其尾選擇行入去公關路，來到「浪LIVE」直播平台做資深公關經理。
不而過，轉換跑道的時間有較晏，侯沛吟分享講，伊一到公司，拄著上大挑戰，就是規間公司員工攏是少年人。面對年歲較輕的少年伙仔，伊就愛學用無仝款的語言模式來應對。進入全新的工課場，對伊來講一開始，真正無適應，想欲佇真短的時間，迒過（hānn kuè）這个坎。
侯沛吟總算是沓沓仔適應落來，毋過成做新興的網路直播平台，變化尤其緊，可能毋是2、3個月一个流行，是逐禮拜、逐工攏有變化。伊分析網路直播是小眾市場，直播主愛揣著家己的特色，利用特色好好仔發揮，嘛通建立個人品牌佮個人IP。
