Rti 中央廣播電臺 
Rti 中央廣播電臺 
來賓：師大臺文系教授/呂美親、奇異果文創總監/劉定綱
《臺灣夜市，Taiwan Yes!》欲來好好仔討論「臺語復興2.0元年」。經過臺語媒體大爆發，今年論真講起來，有真突破性的大進展。阿旻認為「臺語2.0元年」佇出版、佇教育攏有真重大變化。尤其，《臺語現代小說選》、奇異果版本《高中臺語課本》，代表的是「新臺語時代」的意義。這集節目咱邀請臺師大臺文系教授呂美親，閣有奇異果出版社劉定綱創意總監來分享。一集兩位重量級來賓，定著精彩。
美親老師講伊嘉義出世，自細漢就講臺語，當然就成做伊慣勢的生活語言。一直到伊咧讀東海大學中文系的時，才發現伊的「臺灣國語」和其他講華語同學有真大的精差，煞予伊產生真大的衝擊。雖罔彼時已經初初建立臺灣意識，但彼款自卑感猶原咧浮頭。進入清華大學臺文所，接觸濟濟二二八事件的家屬，臺語的訪談過程，才予伊正正認捌「語言對民族文化的重要性」，選定「日本時代臺語小說」做研究主題。關心日本時代的作品和賴和結緣，美親老師用伊的歌聲唱出大文人相思之情。
臺語的實踐方式百百款，除了用臺語歌，美親老師嘛決定用臺語文寫論文。雖罔一開始有影辛苦，尤其早前更加受人質疑。但伊知影若無人開始，咱就無法度行出臺語的復興路。彼時拍的基礎，成做伊22年冬後，編選《臺語現代小說選》實腹的底蒂。
《臺語現代小說選》的出版有影是一種粒積，另外一大粒積是和其他臺師大臺文系教授做伙出版的《高中臺語課本》。今年國、高中就愛開始上本土語言教育，所以講2022年正式進入本土語言2.0元年。
咱欲按怎迒過臺語傳承的危機，論真講起來，就愛予後一代，無仝款的本土語言教育。奇異果文創總監劉定綱，出版這本《高中臺語課本》，想欲予高中生「思辨學臺語，自臺語認捌本土文化」。12大無仝主題有性別、轉型正義、環境議題，有世界文學，目的就是欲予高中生全面啟蒙。伊毋但是語言課本，更加欲予逐家培養用臺語看世界的重要窗口。
